Insaaniyat

Insaan hain, insaan bane rahein
Yahi hai iss dil ki chahat,
Par insaniyaat hi na samajh paaya..
Aasi kyun hain insaanon ki fitraat?

Kya chahte hain hum zindagi se?
Sukh, shaanti, apno ki chahat?
Bas ho agar yahi abhilaasha,
Fir kyun faili hai chaaron taraf nafrat?

Ho rahein hain dange, ho rahi hain ladaiyan,
Bah rahein hai charoon taraf, Bas khoon ke hi dariyaan...
Kyun dete hain hum inko itni mahatwa?
Kyun bhool jaaten hain ke har boond ke saath
Kho rahi hai insaaniyat, apni mool astitwa...

Kya hai inn sab ka lakshya?
Zaydaad? Daulat? Taakat?
Par kyun? Kiske liye?
Jab mit ti hai har pal inse mohabbat..
Batoge kiske saath tum apni khushi?
Jab na rahenge woh apne..unki chahat..
Bas rah jayegi ek sannata...maut ki khamoshi...

Pyaar kya hai, poocho kabhi uss jharne se
Jisne apni sheetalta se pyaar failaaya...
Paththaron ke beech reh kar bhi,
Apne raah mein har pyaase ka pyaas bujhaaya...

Pyaar kya hai, poocho kabhi uss phool se,
Jisne kaaton ke beech bhi hameshaa sirf muskuraya..
Apni ma se khud bichad kar,
Do premiyon ko pyaar ka ehsaas dilaaya...

Pyaar kya hai, poocho kabhi uss aasmaan se,
Jisne saare duniya ko apne god mein bithaaya,
Jo khud toh roya, par apne ashkon ko bahaakar,
Tumhaare chaaron taraf haryaali failaaya...

Pyaar kya hai, poocho kabhi uss zameen se,
Jise har pal tumne apne kadmon se raunda,
Par zindagi kya, tumhaari maut ke baad bhi,
Ussne hi tumhein apne dil mein samaaya...

Bahut garv hai tumhein insaan bankar?
Par yaar insaaniyat ko toh samjho!
Aankhon se parda hata kar kabhi,
Pyaar, mohabbat, chahat ko to samjho!

Kabhi toh uss jharne ko kehne do,
Kabhi toh uss phool ko kehne do,
Kabhi toh uss aasmaan ko kehne do,
Kabhi toh uss zameen ko kehne do,
Ki pyaar kya hai, pooch uss insaan se,
Jisne insaaniyat se yeh duniya banaya!